Saharar guztiek dute liburu bat idazteko, eta sahararren imajinarioan pasarte gisa idatzita dagoen epopeietako bat bizi izan zuen Abdulah Arabik: Tangertik Ceutara modu klandestinoan ihes egin zuten 21 sahararren taldearena. «1985eko irailean sartu ginen Ceutan, modu klandestinoan, eta han asilo politikoa eskatu genuen. Tangerko Espainiako Institutuan ari ginen ikasten, baina unibertsitatera joateko aukerarik ez genuen, hortaz, ihes egitea erabaki genuen». Auziak Espainia eta Marokoren arteko gatazka diplomatikoa eragin zuen, garai hartako prentsan zalaparta handia sortuz. Espainiak ez zien asiloa aitortu, baina ez zituen Marokora deportatu: «Algecirasera eraman gintuzten, eta handik Barajasera, gero hegazkinez Aljeriara, Tindufeko errefuxiatuen guneetara». Arabi Kubara joan zen ondoren nazioarteko harreman politikako ikasketak egitera.

(Fuente:berria-2020/02/29)